Lo clamamos «Aragonario» porque sintetiza os dos conzeptos presens en ista obra: a luenga aragonesa u Aragonés y o Dizionario. Amás d’ixo o sufixo –ario determina una relazión cheneral u espezifica (puesto, colezión, etz.) con a base a la cuala s’achunta.

O Gubierno d’Aragón ofrexe, dende abril de 2019, una versión electronica revisada d’a cuartena edizión d’o Vocabulario basico bilingüe. Aragonés-Castellano y Castellano-Aragonés (Zaragoza, 2013), d’Antonio Martínez Ruiz, azesible a traviés d’internet en sentiu Castellano-Aragonés que contaba en a primera versión con un total de 8.653 dentradas en castellano, con a suya correspondién traduzión a l’aragonés, dando en muitos casos exemplos d’uso y, si se trata de verbos, a suya conchugazión, bien siga completa, ta los verbos regulars que se consideran modelo de cadaguna d’ellas, a suya remisión a lo modelo, u a conchugazión d’os irregulars en aquellas personas y tiempos que asinas lo sigan, remitindo en a resta a lo modelo de conchugazión bien siga a primera, a segunda u a terzera. En as suzesivas versions (chulio de 2019 y chinero de 2020), o numero de dentradas ha iu crexendo dica plegar a las 23.212, incluyendo-se/incluyindo-se, amás, totas as variedaz comarcals.

En a suya cuartena versión (marzo de 2021) ofrexe tres importans novedaz:

1. A encorporazión d’a direzión aragonés-castellano, con 40.481 dentradas, que replega totas as variedaz comarcals.
2. A mesa a la disposizión d’os usuarios d’o “Conchugador de verbos” d’o que ye autor Chorche Pérez, con o que puede veyer-se como conchuga cadagún d’os verbos aragoneses, tanto en a suya versión ozidental como oriental.
3. Finalmén, a inclusión de 3.237 nuevas dentradas en castellano, con o que ya plegan a 26.449.

A zinquena versión (aviento de 2022) incorpora una nueva utilidat: os vocabularios tematicos, iniziando-se con os de termins churidicos y administrativos, flora y fauna.

Ta más informazión consulte a sezión d’aduya de l’aragonario 

Iste treballo ha estau posible grazias a lo Programa INTERREG V-A España-Francia-Andorra, nombrau LINGUATEC en o cual partizipa o Gubierno d’Aragón, a traviés d’a SOCIEDAD DE PROMOCIÓN Y GESTIÓN DEL TURISMO DE ARAGÓN, S.L.U., junto con ELHUYAR FUNDAZIOA, LO CONGRÈS PERMANENT DE LA LENGA OCCITANA, UNIVERSIDAD DEL PAÍS VASCO / EUSKAL HERRIKO UNIBERSITATEA,CNRS (CENTRE NATIONAL DE LA RECHERCHE SCIENTIFIQUE)- DELEGATION REGIONALE MIDI-PYRENEES, EUSKALTZAINDIA – REAL ACADEMIA DE LA LENGUA VASCA, ta lo periodo de chinero 2018 a aviento de 2020.